السلام عليكم ورحمة الله وبركاته
اسعد الله جميع اوقاتكم بالخير
ااخر ما كتبت اتمنى ان يعجبكم ...
ياقلب قلي صاحبي وش جراله
يومه تعذر عن وصولي وصاله
قد كان يسأل بس طول سؤاله
وعذر المغيب معه ياجي بعذره
من دون وصله ما طعمت الوناسه
وقلبه فبعده هاجس الهم حاسه
لكن اظنه مشغلته الدراسه
و الله يعينه والله ييسر امره
ياليتني دفتر ادب في يدينه
ويقرا مشاعر في ضميري دفينه
واشعار وخطابات ترجي حنينه
من يوم غاب الحال مامل شعره
والا انجليزي يدرسه لاختباره
ويشوف قلبي وش كتب في جداره
مكتوب ( آي لاف يو ) بصدق العباره
وبكل حرف ٍ تذرف العين عبره
والا رياضيات وارقام وحساب
ذاكر وراجع بين تلخيص وكتاب
ومعادلات القلب مابين الاحباب
والناتج انت وغيرك يشوف صفره
او فيزيا لاجيت تقرا علومي
تشوف طاقه وسط قلبي تحومي
تشّغل التفكير بك طول يومي
في قلب ما ينفذ ولا يمل صبره
او كيميا فيني مذيب ومحاليل
ومعادلاتٍ ترفض القال والقيل
تصفى على حبك جميع المفاعيل
علم موثق فيه فنٍ وخبره
او ليتني احياء فيني مفاهيم
وفيني حياه وروح تحتاج ترميم
وفي القلب فطريات من كثر مااهيم
ومن كثر ماولعت بالشوق جمره
او نحو فيه اسماء وافعال وحروف
وتعرب شعوري لك وثم احكم وشوف
منهو يحب الثاني اكثر وملهوف
وكل واحد له مقامه وقدره
او ليتني حاسب به القلب شغال
فيني برامج تطلبك حب ووصال
وماضرها فيروس ساقوه عذال
عندي حمايه تمسحه قبل ضره
وجولوجيا تقرا تضاريس قلبي
وتقرا مناخه كيف صافي بحبي
ويمك رياح الشوق مني تهبي
تحمل سلام وحب ياكبر كبره
لا ياعسى قلبك يحقق مراده
وتنجح وتفرح وتنبسط بالشهاده
وربي ييسر لك دروب السعاده
وقلبي معك مامل شوقه وصبره
